Helga Þórey í Undralandi

Mér verður illt í maganum og ég fæ óbragð í munninn þegar ég hugsa til kveifarskapar íslenskra stjórnvalda í málefnum Ísraels og Palestínu. Ég þoli ekki að hugsa til þess að nú eigi að beita sömu aðferðum og gert var við upphaf Íraksstríðsins og sauma varir ríkisstjórnarinnar fastar við rassgatið á Bretum og Bandaríkjamönnum.

ISG sér ekki ástæðu til að segja okkur út stjórnmálasambandi við Ísrael. Að minnsta kosti samkvæmt viðtali sem ég las við hana um daginn. En ég vil ekki vera í stjórnmálasambandi við Ísrael. Mér finnst að íslenska þjóðin eigi að taka afstöðu gegn öllum hernaði. Stríð er alltaf ógeðslegt en þegar saklausir borgarar eru króaðir af og teknir af lífi er mér gjörsamlega misboðið. Mér verður óglatt. Óglatt við tilhugsunina að einhverstaðar á einhverjum pappír úti í heimi kemur friðsamleg afstaða mín ekki fram. Óglatt að búa við ofríki stjórnvalda sem sætta sig við barnamorð í þágu vinsemdar við kapítalískan skríl.

Á meðan við eru í stjórnmála- og viðskiptasambandi við þetta land erum við að loka augunum fyrir ógeðslegum glæpum á hendur sakleysingja. Þetta eru líka okkar börn.